諗起 97年…..

 



早兩日打風放了個上午假. o黎緊七一有一日假期, 都好. 休息o下.

今日又繼續幫蛙爸搞埋部腦, 部腦太慢啦…. 是但, 佢地都係上網睇o下o野, 唔使咁快.  哈~ 原來蛙爸有在朋友面前曬料.. 叫人地(都係長者啦)自己上網 check o下料就得啦 (例如政府book場資料)   都好, 部腦有些少用途. 如果可以再擴大使用就好了. 可以睇多好多o野.

嗯~~ 蛙婆狀態一落千丈, 一個月內變得好快, 照咁睇…. 今年可能…..唉~~ 蛙擔心o既唔係蛙婆,而係蛙媽. 當年蛙公走時都好大影響.  其實蛙呢個擔心, 已經開始一段時間…  有時就係咁, 一樣影響另一樣….. 所以我而家已叫定蛙媽要有心理準備….. 等佢漸進適應. 希望啦.   蛙媽已經諗定買黑衫、接待外國返來o既 relatives、隨時準備應變…..

 

日日落雨….. 有 d 似曾相識感覺….. 呀~~似 97年?? 回歸前一段時間真係日日落雨, 傾盆大雨..痴線.

回歸日&夜…. 蛙有去添馬艦附近, 就在不烈巔尼亞號對面見到肥彭坐駕使到. 話時話, 英國佬又真係幾親民. 我同不烈巔尼亞號只係馬路兩邊之隔,  亦都唔算太多警察, 自由遊蕩. 回歸前添馬艦 (真係有隻艦叫做”添馬艦”)泊在添馬艦碼頭, 我都有影相. 呢隻就係護航艦.  o個晚半夜我返o左屋企, 上左大廈天台, 睇住不烈巔尼亞號+軍艦 慢慢駛離.  仲記得方向係由中環向柴灣方向離開. 天上有直昇機跟隨.  最最犀利o既係….. 軍艦上面海軍列隊, 發號施令o個位”大聲公” 把聲真係好大 !! 大到佢係維港中間叫命令, 我係屋企天台竟然聽到 !! 哈~~ 真係要識運氣先得, 唔係嗌一晚就失聲了. 

回歸 11年.  11年來印象就是….衰、煩、亂….