多謝咁多位關心, 唔使理我. 我係一舊垃圾. 自生自滅.
昨晚的事其實冇咩大不了, 對其他人來講會覺得好笑. 只係一時感觸, 可能又嚇親人. 希望唔會嚇親某人. 我冇事的.
我自己都唔知 原來某人係蛙心中佔據咁重要位置. 算啦. 蛙呢舊垃圾 不知所謂 唔需要理會. 好多謝某人, 一併將唔關某人事o既情緒一次勾哂出來. 我冇情緒病, 唔會無啦啦喊. 相信唔係痴線, 只係一時勾哂其他野出來. 好對唔住. 唔關你事的.
今日非常低落, 6點瞓,10點半起身. 又再出街做行屍. 落 MTR, 月台冇乜人, 遇著個婆婆, 7x歲左右, 佢話想去黃大仙 but 搭錯車搭過龍, 而家又唔識轉車, 唔知點搭.
節錄對話….:
蛙: 我橫掂都去o個頭, 跟住我行啦, 我帶你去.
婆: 咁就好囉. 今次真係出路遇貴人. 好多謝你呀.
蛙: 唔使客氣. (車到)
婆: 今次真係出路遇貴人, 先生, 你真係好人. 好彩遇到你, 唔係唔知點.
蛙: (指著地鐵上面路線圖) 一陣轉兩次車就得……
婆: 我唔識(睇)呢 d…. 唔好意思呀. 好彩遇到你, 你真係好人呀, 好人有好報, 祝你全家安康行好運呀.
蛙: 哦. 多謝多謝. (我個靈魂都唔係度, 唔好以為我好人啦, 咩人叫我做咩都唔係好知咋) 婆婆, 你坐底先啦.
….. (北角站)
蛙: 轉車了…. 跟著我行….
婆: 多謝你, 多謝你. 你好好人, 又靚仔….
蛙: 哦, 多謝多謝. 到站我叫你……
婆: 好多謝你呀, 今次真係出路遇貴人….. 你真係好靚仔呀, 皮膚又白…又滑
…. 成個靚仔樣呀…. (附近方圓十幾廿人聽緊你講o野呀婆婆~)
蛙: 哦, 多謝多謝.
….. (油塘站)
蛙: 轉車了…. 跟著我行…. 轉了今次一直去就到黃大仙站了. (一齊坐)
婆: 好人有好報呀. 睇你鼻短短, 好相與呀, 如果鼻長長 d 人就好硬頸, 唔聽人講. 你就會聽人講, 有商有量… 你好相與呀, 一定有成就.
蛙: 哦, 多謝多謝. (我唔係咁好相與咋, 未見過我寸個樣同埋惡個樣~)
婆: 你下巴兜兜, 係有福之相. 晚年會好好. 真架. 仲有, 男人口有角先好, (咩角呀?? 犀牛角???) (婆婆向前曲身睇蛙面相….) 係喎, 咀兩邊有角真係有 兩邊都有, 向上勾勾, 男人有呢個相可以食四方, 有好大發展…..(口大食四方?? 我個口唔係好大喎…) 真係靚仔, 靚仔相, 非常好. (對面坐位個姐姐開始定神做聽眾….)
蛙: 唔係啦….
婆: 係啦, 直頭係. 好相呀, 心地又好… 你將來會搵大錢, 有好大發展, 你呢個相做生意人地唔做o既 你好相與就做, 比著個硬頸o既就做唔到 , 咁樣就可以有成就, 你將來會搵大錢. 信婆婆.
蛙: 哦, 多謝多謝. 婆婆你都幾有研究…..
婆: 真架, 你將來一定搵大錢, 會好有成就….. 你將來搵大錢之後 諗返起就會知道婆婆講o既o野冇錯.
蛙: 哦, 多謝多謝. 我呢, 搭兩個站咋, 我落車後你數住第5個落車就o岩. 你聽住架車講站名啦……
婆: 今次真係出路遇貴人. 多謝你呀. 係呢, 你結婚未?
蛙: 未.
婆: 你未結婚, 一定會搵到個好好o既女仔, 真架. 如果結左婚 你o既婚姻會好好. (阿婆婆, 你而家囉境定贈慶呀, 搵鬼到大錢咩, 有鬼好女仔吼咩… 唔見我死狗咁咩? 知唔知我咩事死狗呀? 唉~ )
蛙: 多謝多謝…. 我要落車喇. 你自己聽叫站名啦.
婆: 得架喇, 我會聽住. 你會有好大成就. 會有好好女仔.
蛙: 係係係… 你落車識唔識路架?
婆: 識架喇. 多謝你呀先生…. 多謝哂.
蛙: 拜拜 
***
呢個婆婆話去黃大仙交 d o野比人, 一袋疑似食物物體. 唔係去拜神.
蛙 n 年前曾在黃大仙求得第一簽.
似乎唔靈啦. 唔好再講笑啦~
自己知自己事~ 蛙點會有機會”龍虎風雲際會時”o丫
一舊垃圾 不知所謂
———–黃大仙
第一簽： 上上簽 占驗古人 姜太公封相
* 靈簽求得第一枝，龍虎風雲際會時；
* 一旦凌霄揚自樂，任君來往赴瑤池。
仙機：
功名遂，求財豐，六畜吉，家宅隆；病即愈，蠶有功；孕生子，婚姻同；行人至，快如龍；若謀望，盡亨通。
1. 問風水： 發貴兼丁財
2. 問遺失： 即得回原物
3. 問自身： 四季俱平安
4. 問天時： 豐稔又可喜
5. 問交易： 到處有喜色（唯首簽有“'問交易”項）
6. 問出行： 往來皆合心
* 注解： 龍虎得風雲會合，則龍飛到上天去，揚揚快樂，即瑤池仙家地方，亦可到矣，此是榮華發達之象也。求得此簽者，定百事如意，真第一枝上簽也。
附注：周朝興國功臣姜太公，又名尚，字子牙，汲人（東海許州人），道號“飛熊”。先世封於呂，亦曰呂望，避商紂亂，居東海之濱，釣於溪（渭水），其鈎為直，意不在魚，志在君相。文王聞其賢，聘為師（丞相），其時年八十。後周伐紂，滅商興周，武王稱曰“尚父”，封其子丁公於齊。
———–
(0)
